టైటిల్: సీతారం సిత్రాలు
తారాగణం : లక్ష్మణ మూర్తి రతన, భ్రమరాంబిక తూటిక, కిషోరి ధాత్రక్, ఆకెళ్ళ రాఘవేంద్ర, సందీప్ వారణాసి, ఢిల్లీ రాజేశ్వరి, కృష్ణమూర్తి వంజారి
బ్యానర్: రైజింగ్ హాండ్స్ ప్రొడక్షన్స్
నిర్మాతలు: పార్థ సారధి, డి. నాగేందర్ రెడ్డి, కృష్ణ చంద్ర విజయ బట్టు
రచన, దర్శకత్వం: డి.నాగ శశిధర్ రెడ్డి
కెమెరామెన్: అరుణ్ కుమార్ పర్వతనేని
మ్యూజిక్: రుద్ర కిరణ్
చిన్న సినిమాలు ప్రస్తుతం మంచి విజయాన్ని అందుకుంటున్నాయి. ఈ క్రమంలో మంచి కంటెంట్‌తో చిన్న సినిమాగా నేడు ప్రేక్షకుల ముందుకు వచ్చింది ‘సీతారాం సిత్రాలు’. కొత్తవాళ్లతో చేసిన ఈ సినిమా ఎలా ఉంది? ప్రేక్షకులను ఏ మేరకు అలరించింది అనేది తెలుసుకోవాలంటే ముందు కథలోకి వెళదాం…
కథ:
కర్నూలుకు దగ్గరల్లో ఒక చిన్న టీస్టాల్ నడుపుకుంటూ ఉంటాడు శివ(లక్ష్మణమూర్తి). శివ పెట్టే టీ తాగితే ఎంతటి తలనొప్పి అయినా మాయం అవ్వాల్సిందే. ఆకెళ్ల రాఘవేంద్ర లాంటి వాళ్లు చెప్పే మంచి మాటలను వాట్సప్‌లో స్టేటస్‌గా పెడుతూ అందరితో ‘స్టేటస్ శివ’ అని పిలిపించుకుంటూ ఉంటాడు. జీవితంలో మంచి సక్సెస్ అందుకుని అందరికీ ఇన్స్‌పిరేషన్‌గా ఉండాలని అనుకుంటుంటాడు. ఈ గ్యాప్‌లో టీచర్‌గా పని చేసే పార్వతి( భ్రమరాంబిక)తో ప్రేమలో పడతాడు. అనుకోకుండా ఆమెతోనే పెళ్లి ఫిక్స్ అవుతుంది. పెళ్లి గ్రాండ్‌గా చేసుకోవాలని భారీగా అప్పు చేసి ఏర్పాట్లు చేసుకుంటాడు. అయితే హీరోయిన్ తండ్రి.. వాళ్ల బంధువుల మాటలు విని పెళ్లిని ఆపేస్తాడు. దీంతో ఏం చేయాలో తెలియక, అప్పులు ఎలా తీర్చాలో తెలియక ఆలోచనలో పడతాడు. తన తండ్రి బతికున్నప్పుడు చేసిన వీసీఆర్ వర్క్ చేసి అప్పులు తీర్చాలనుకుంటాడు. ఈ క్రమంలో విలన్ ఎంట్రీ ఇస్తాడు. దాంతో శివ లైఫ్ ఎలాంటి టర్న్ తీసుకుంది? తన స్నేహితుడు రవి సాయం చేశాడా? మోసం చేశాడా? శివ జీవితంలో సక్సెస్ అయ్యాడా? లేదా? పార్వతితో శివ పెళ్లి జరిగిందా? అనేది తెలుసుకోవాలంటే సినిమా చూడాల్సిందే.
విశ్లేషణ:
ప్రస్తుతం వయలెన్స్, రొమాన్స్ ఎక్కువ ఉన్న సినిమాలు వస్తున్నాయి. దీంతో కుటుంబంతో కలిసి చూసే సినిమాలు తగ్గిపోయాయి. అందుకే దర్శకుడు నాగ శశిధర్ కుటుంబం మొత్తం కలిసి చూసే సినిమాను సీతారాం సిత్రాలు ద్వారా ప్రేక్షకుల ముందుకు తీసుకొచ్చాడు. చిన్న సినిమాల్లోనే ప్రస్తుతం కంటెంట్ బాగా ఉంటోంది. సీతారాం సిత్రాలులో కూడా కంటెంట్ ప్రేక్షకులను ఎంగేజ్ చేసేలా ఉంది. ప్రతి ఒక్కరి జీవితంలో నిశ్చితార్థం, పెళ్లి, నామకరణం లాంటి శుభకార్యాలు జరుగుతుంటాయి. ఆ సమయంలో తీసిన ఫొటోలను, వీడియోలను మధుర జ్ఞాపకాలుగా దాచుకుంటారు. అయితే గతంలో వీసీఆర్ క్యాసెట్‌లో వాటిని భద్రపరిచేవారు. ప్రస్తుతం వీసీఆర్ ప్లేయర్స్ ఎవరి ఇళ్లలోనూ లేవు. కాలం మారుతున్న కొద్దీ సీడీలు, పెన్‌డ్రైవ్‌లు, చిప్‌లు వచ్చేశాయి. ఈ పాయింట్‌ను తీసుకుని దర్శకుడు నాగ శశిధర్ కథను నడిపించాడు. వీసీఆర్ క్యాసెట్ నుంచి నుంచి సీడీకి, పెన్‌డ్రైవ్‌కు డేటాను ట్రాన్స్‌ఫర్ చేసే ప్రక్రియను చూపించాడు. ఇది చిన్న సినిమా అయినా ఎన్నో విషయాలను దర్శకుడు ఇందులో స్పృశించాడు. మనసుకు నచ్చిన పనిని మరింత ఇష్టంగా చేస్తే విజయం వరిస్తుందని చూపించాడు. బంధువులు అనేవాళ్లు మాటలు చెప్పడానికే కానీ, మనం ఆపదలో ఉన్నప్పుడు ఆదుకునేందుకు పనికిరారనే జీవిత సత్యాన్ని చెప్పాడు డైరెక్టర్. అలాగే స్నేహితులు కూడా మనల్ని నమ్మించి ఎలా మోసం చేస్తారో చూపించాడు. ఆడవాళ్లు సీరియల్స్ మాయలో పడి ఇంట్లో వాళ్లను కూడా అందులోని పాత్రలుగా ఊహించుకోవడం ఎలా ఉంటుందో చూపించాడు.
మొత్తంగా దర్శకుడు నాగ శశిధర్ తను ఎంచుకున్న పాయింట్‌ను చెప్పడంలో ఎక్కడా తడబడకుండా కథను నడిపించాడు. అయితే సెకెండ్ హాఫ్‌లో కొన్ని సన్నివేశాలను మరింత పకడ్బందీగా రాసుకుని ఉంటే సినిమా ఇంకా బాగా వచ్చి ఉండేది. అలాగే ముఖ్య పాత్రల్లో కొంచెం తెలిసిన వాళ్లను తీసుకుని ఉంటే సినిమా స్థాయి కూడా పెరిగేది. కర్నూలు బ్యాక్‌డ్రాప్‌లో చాలా వరకు ఫ్యాక్షన్ సినిమాలు వస్తే.. డైరెక్టర్ నాగ శశిధర్ మాత్రం కొత్త పంథాలో సందేశాత్మక చిత్రాన్ని అందించాడని చెప్పొచ్చు. ప్రస్తుతం చాలా మంది యువత ప్రేమలో ఓడిపోతే కుంగిపోవడం, జీవితంలో సక్సెస్ రాకపోతే కృశించిపోవడం చేస్తున్నారు. అలాంటి వాళ్లు నిరుత్సాహం నుంచి బయటకు వచ్చి జీవితంలో ఎలా విజయం సాధించాలో చెప్పే ఈ చిత్రాన్ని యూత్ తప్పక చూడాలి.
హీరోగా చేసిన లక్ష్మణ మూర్తి తన పాత్రకు న్యాయం చేశాడు. మనసుకు నచ్చిన అమ్మాయిని పెళ్లి చేసుకోవడం, జీవితంలో సక్సెస్ అవడం అనే రెండు లక్ష్యాలున్న యువకుడి పాత్రలో ఒదిగిపోయాడు. టీమాస్టర్ పాత్రను చాలా ఈజ్‌తో చేశాడు. ఒక హీరోయిన్ భ్రమరాంబిక తన అందంతో ఆకట్టుకుంది. టీచర్ పాత్రలో హుందాగా కనిపించింది. తన హావభావలతో ప్రేక్షకులను మంత్రముగ్దులను చేసింది. ఈ సినిమాతో ఈమెకు మరిన్ని సినిమాలు వచ్చే అవకాశం ఉంది. హీరో తల్లి పాత్రలో నటించిన ఢిల్లీ రాజేశ్వరి తన పాత్రను చక్కగా పండించారు. మిగతా నటీనటులు కూడా తమ పాత్రల పరిధిమేరకు నటించారు. దర్శకుడు నాగ శశిధర్ నూతన నటీనటులతో చేసిన ఈ ప్రయత్నం బాగుంది. దర్శకుడిగా తీను చెప్పాలనుకున్న పాయింట్‌ను సూటిగా చెప్పడంలో సక్సెస్ అయ్యాడు. అరుణ్ కుమార్ పర్వతనేని సినిమాటోగ్రఫీ కనువిందుగా ఉంది. రుద్ర కిరణ్ ఇచ్చిన సంగీతం రణగొణ ధ్వనులకు విరుద్ధంగా వినసొంపుగా ఉంది. నిర్మాతలు పార్థ సారధి, డి. నాగేందర్ రెడ్డి, కృష్ణ చంద్ర విజయ బట్టు సీతారాం సిత్రాలను కుటుంబంతో కలిసి చూసేలా నిర్మించారు. తలనొప్పి వచ్చినప్పుడు చక్కటి టీ తాగితే ఎంత ఉపశమనం కలుగుతుందో.. కుటుంబంతో కలిసి ఈ సినిమా చూస్తే అలాంటి ఫీల్ కలుగుతుంది.
మనసుకు రిలీఫ్‌నిచ్చే ‘సీతారాం సిత్రాలు’
రేటింగ్: 3/5
