సంగీతం నేపథ్యంలో తెలుగు తెరపై వచ్చిన కథలకు ప్రత్యేకమైన స్థానం ఉంది. ఇప్పుడు అదే సంగీతాన్ని ఆధారంగా చేసుకుని రూపొందిన వెబ్ సిరీస్ ‘జగమే సంగీతం’. ప్రకాష్ రాజ్, శ్రీకాంత్, మధుబాల, అక్షయ్ లాగుసాని, సుస్మితా శెట్టి ప్రధాన పాత్రల్లో నటించిన ఈ సిరీస్ సెప్టెంబర్ 4 నుంచి అమెజాన్ ప్రైమ్ వీడియోలో స్ట్రీమింగ్ అవుతోంది. ‘బండిష్ బ్యాండిట్స్’ స్ఫూర్తితో రూపొందిన ఈ మ్యూజికల్ డ్రామాకు పల్నాటి సూర్యప్రతాప్ దర్శకత్వం వహించారు.
కథేంటి?
వైకుంఠపురం నేపథ్యంలో కథ మొదలవుతుంది. ప్రముఖ కర్ణాటక సంగీత విద్వాంసుడు శాస్త్రి (ప్రకాష్ రాజ్). సంగీతాన్ని ఆయన ఒక కళగా భావిస్తారు తప్ప వ్యాపారంగా చూడరు. తన సంగీత వారసత్వాన్ని మనవడు బాలు (అక్షయ్ లాగుసాని) ముందుకు తీసుకెళ్లాలని కోరుకుంటారు.
మరోవైపు పల్లవి (సుస్మితా శెట్టి) పూర్తిగా ఆధునిక ఆలోచనలు ఉన్న యువతి. సోషల్ మీడియా, రీల్స్, ఆటోట్యూన్ ద్వారా పాపులర్ కావాలనేది ఆమె లక్ష్యం. ఇలా ఒకవైపు సంప్రదాయ సంగీతం, మరోవైపు నేటి ట్రెండ్ మధ్య ఆసక్తికరమైన సంఘర్షణ మొదలవుతుంది.
ఇదే సమయంలో శాస్త్రికి సవాల్ విసురుతూ త్యాగరాజు (శ్రీకాంత్) రంగంలోకి వస్తాడు. ఈ సవాల్ వల్ల బాలు తన తాత గౌరవాన్ని కాపాడుకోవాల్సిన పరిస్థితి ఏర్పడుతుంది. బాలు, పల్లవి ప్రయాణం ఎటు వెళ్లింది? శాస్త్రి, త్యాగరాజు మధ్య పోటీ ఏంటి? చివరికి బాలు తన కుటుంబాన్ని, సంగీత వారసత్వాన్ని ఎలా నిలబెట్టాడు? అనేది మిగిలిన కథ.
ఎలా ఉంది?
సంగీతం ప్రధానంగా సాగే కథ కావడంతో మొదటి నుంచే ఒక మంచి ఫీల్ వస్తుంది. సంప్రదాయ కర్ణాటక సంగీతాన్ని, ఆధునిక తరం ఆలోచనలను కలిపే ప్రయత్నం ఆసక్తికరంగా ఉంది. ముఖ్యంగా సంగీతాన్ని కేవలం నేపథ్యంగా కాకుండా కథలో ఒక భాగంగా చూపించేందుకు దర్శకుడు చేసిన ప్రయత్నం మెచ్చుకోదగినది.
శాస్త్రి పాత్రలో ప్రకాష్ రాజ్ మరోసారి తన అనుభవాన్ని చూపించారు. క్రమశిక్షణ, సంప్రదాయాల విషయంలో రాజీ పడని కుటుంబ పెద్దగా ఆయన నటన ఆకట్టుకుంటుంది. శ్రీకాంత్ కూడా తన పాత్రకు తగ్గట్టుగా కనిపించారు. అక్షయ్ లాగుసాని, సుస్మితా శెట్టి తమ పాత్రల్లో సహజంగా నటించారు. మధుబాల పాత్ర కూడా కుటుంబంలోని భావోద్వేగాలను చక్కగా చూపిస్తుంది.
అయితే కథనం విషయంలో సిరీస్ పూర్తిగా ఆకట్టుకోదు. ప్రారంభ ఎపిసోడ్స్ కొంత నెమ్మదిగా సాగుతాయి. కథలో ప్రధాన సంఘర్షణ బలంగా మారే వరకు పెద్దగా ఆసక్తి కలగదు. బాలు తన గుర్తింపును దాచుకుని వైరల్ పాటల వైపు వెళ్లే కొన్ని సన్నివేశాలు కూడా పూర్తిగా నమ్మించేలా లేవు.
విశాల్ చంద్రశేఖర్ సంగీతం వినడానికి బాగుంది. సంగీత నేపథ్యంతో తెరకెక్కిన కథకు తగ్గట్టుగా మంచి స్వరాలను అందించారు. అయితే కొన్ని కీలక సన్నివేశాల్లో కావాల్సిన స్థాయి భావోద్వేగాన్ని సంగీతం పూర్తిగా పెంచలేకపోయింది. చివరి ఎపిసోడ్లో వచ్చే జుగల్బందీ మాత్రం సిరీస్లో చెప్పుకోదగ్గ హైలైట్గా నిలుస్తుంది.
చివరగా..
శాస్త్రీయ సంగీతం, కుటుంబ విలువలు, ఆధునిక తరం ఆలోచనలను కలిపి చెప్పిన మంచి ప్రయత్నం ‘జగమే సంగీతం’. నటీనటుల పెర్ఫార్మెన్స్, సంగీతం, నిర్మాణ విలువలు ప్లస్ పాయింట్స్. అయితే కథనం మరింత బలంగా ఉండి, భావోద్వేగాలను ఇంకాస్త లోతుగా చూపించి ఉంటే సిరీస్ స్థాయి మరింత పెరిగేది.
ఓవరాల్గా.. వీకెండ్లో ప్రశాంతంగా ఓటీటీలో చూడాలనుకునే వారికి ‘జగమే సంగీతం’ ఓ మంచి ఆప్షన్.
రేటింగ్ : 3/5
