రోజూ గ‌డ్డి తినే గేదెలకు క‌ళ్ల‌జోడు అక్క‌ర్లేదు ఎందుకు? ప‌చ్చిమేత‌తో క‌డుపునింపుకునే మేక‌లు ఎందుకంత వేగంగా ప‌రుగెత్తుతాయి. ఏనుగంత బ‌లం అంటూ గొప్ప‌గా చెప్పే గ‌జ‌రాజు కూడా శాకాహారే. ఇంత గొప్ప‌ద‌నం ఉన్న శాకాహారం మానేసి ఫాస్ట్‌ఫుడ్ అంటూ.. దొరికిన‌వ‌న్నీ తినేసి రోగాల పుట్ట‌గా జ‌నం మారిపోతున్నారంటూ ఇటీవల నేష‌న‌ల్ ఇనిస్టిట్యూట్ ఆఫ్ న్యూట్రీషియ‌న్ కూడా స‌ర్వేలో తేల్చాయి. విట‌మిన్ల కోసం మాత్ర‌లు.. బ‌లం పొందాల‌ని టానిక్‌లు తాగ‌టం వ‌దిలేసి.. ఎంచ‌క్కా శాకాహారాన్ని తీసుకుంటే క‌రోనాను మాత్రమే కాదు.. ఎన్నో రోగాల‌ను త‌ట్టుకోగ‌ల రోగ‌నిరోధ‌క‌శ‌క్తి(ఇమ్యూనిటీ) సొంతం అవుతుందంటున్నారు వైద్యులు అండ్ న్యూట్రీషియ‌నిస్టులు కూడా.
ఇటీవల వరకూ శాఖాహారం పై జరిగిన పరిశోధనలు ఎక్కువగా శాఖాహారులకు సంపూర్ణ పౌష్టికాహారం అందించాలి లేదా అందుతున్నదనే విషయంపై మాత్రమే దృష్టి కేంద్రీకరిస్తే ఇపుడు అవి అందించే ఆరోగ్యపరమైన లాభాలపై కూడా విస్తృతంగా జరుగుతున్నాయి. ఇప్పటికే శాఖాహారం కారణంగా ఎన్నో దీర్ఘకాలిక రుగ్మతలు రాకుండా లేదంటే వాటి ప్రభావాన్ని తగ్గించుకోవడానికి ఉపయోగపడుతున్నాయనే అంశం స్పష్టమవుతోంది. నాణానికి రెండు వైపులా ప్రతి వాదనకు ప్రతి వాదన ఉంటుంది. అలానే శాఖాహారం పై ప్రజలలో కూడా ఎన్నో అపోహలు పాతుకొని ఉన్నాయి. అపోలో క్రేడ‌ల్‌, చిల్డ్ర‌న్ హాస్పిటల్ చీఫ్ న్యూట్రీషియ‌నిస్ట్ వి.కృష్ణ‌దీపిప పలు సూచ‌న‌లు చేశారు.
అపోహలపై నిపుణుల జవాబులు చూద్దాం….
అపోహ: శాఖాహారం లో శరీరానికి అవసరమైన ప్రోటీన్ దొరకదు?
వాస్త‌వం: శాఖాహారం కారణంగా శరీరానికి అవసరమైన ప్రోటీన్లు లభ్యం కావనేది ఒక పెద్ద అపోహ. శాఖాహారంలో భాగమైన పప్పు ధాన్యాలు, మొలకలెత్తిన విత్తనాలు, ఓట్స్, సోయా, బాదం, అక్రోట్ లాంటి డ్రై ఫ్రూట్స్, బీన్స్, విత్తనాలు, పాలు మరియు పాలపదార్థములైన పన్నీరు వంటి వాటిలో ప్రోటీన్లు ఉండి అవసరమైనంత దొరుకుతాయి.
అపోహ : శాఖాహారం వంటకాలు రుచిగా మరియు వైరటీ గా ఉండవు?
వాస్త‌వం: ఇతర ఆహార పదార్థముల వలే శాఖాహార ఆహార పదార్థములు కూడా రుచిగానే ఉంటాయి. శాఖాహార పదార్థములతో ఎన్నో రకములైన వంటలు చేయవచ్చు. అంతే గాకుండా సంపూర్ణ పోషకాలు అందించేలా ఈ వంటలను మలచుకొని సరికొత్త వంటకాలు తయారు చేయవచ్చు. ఇందులో ఉంటే వైరటీలు జిహ్వచాపల్యాన్ని చక్కగా సంతృష్టపరుస్తుంది.
అపోహ : శాఖాహారిగా ఉంటే ఏదైనా సైడ్ ఎఫెక్ట్ ఉంటాయా?
వాస్త‌వం: పూర్తిగా శాఖాహారిగా ఉంటే ఎటువంటి సైడ్ ఎఫెక్ట్స్ ఉండవు. ఒక వేళ మీరు పూర్తిగా నాన్ వెజిటేరియన్ గా ఉంటూ శాఖాహారిగా మారితో మాత్రం మీ కడుపు పూర్తిగా నిండడం లేదనే భావన కలుగవచ్చు. అయితే దీనిని తగ్గించడానికి ఎక్కువగా పప్పులు, కూరగాయలు, సలాడ్ లు తీసుకోవడం చేయాలి.
అపోహ : జీవితమంతా శాఖాహారిగా ఉండడం సాధ్యమేనా?
వాస్త‌వం: శాఖాహారిగా ఉండడం వలన వచ్చే నష్టాలేమీ లేవు. అయితే తీసుకొనే ఆహారంలో శరీరానికి అవసరమైన అన్ని పౌష్టిక పదార్థములు ఉండేలా మేళవించి పదార్థములు రూపొందించి ఆహారాన్ని సంపూర్ణ పౌష్టికాహారంగా మలచుకోవాలి.
అపోహ : మాంసాహారులకన్నా శాఖాహారులు ఆరోగ్యంగా ఉంటారా?
వాస్త‌వం: సాధారంగా శాఖాహారంలో జంతువుల ప్రొటీన్, కొలెస్ట్రాల్ మరియు కొవ్వు తక్కువగా ఉండి ఎక్కువ ఫైబర్ ఉంటుంది. దాని కారణంగా ఊబకాయం, హృదయ సంబంధిత రోగాలు, అధిక రక్తపోటు, కొన్ని రకములై క్యాన్సర్ ల ప్రమాదం తక్కువగా ఉంటుంది. అయితే మానవుని జీవన శైలి కూడా శాఖాహారం అందించే ఆరోగ్యంపై ప్రభావం చూపుతుంది. మంచి ఆరోగ్య శైలి తో పాటూ సంపూర్ణ పోషకాలు అందించే ఆహారం తీసుకొంటే మాత్రం తప్పకుండా మంచి ఆరోగ్య ఫలితాలే వస్తాయి.
అపోహ : ఇక శాఖాహారం కారణంగా ఆరోగ్యకరమైన బరువు ఉంటుందా?
వాస్త‌వం: శాఖాహారం తీసుకోవడం వలన సాధారణంగానే మీ బరువు నియంత్రణలో ఉంటుంది. ఎందుకంటే శాఖాహారం తక్కువ కొవ్వు మరియు కాలరీలు కలిగి ఉంటుంది. అలానే మొక్కల ఆధారిత ఆహారంలో ఎక్కువగా ఫైబర్ మరియు సంక్లిష్టమైన కార్భోహైడ్రేట్స్ ఉండడం వలన మెటబాలిజం ను పెంచుతుంది. దీంతో మీరు ఎక్కువ కాలరీలను వినియోగిస్తూ కొవ్వును కరిగిస్తూ ఉండి తద్వారా బరువు పెరుగకుండా ఉంటుంది.
అపోహ : నేను మాంసాన్ని ఎక్కువగా ప్రేమిస్తాను అయితే శాఖాహారిగా మారలనుకొంటున్నాను….అయితే ఎలా?
వాస్త‌వం: ఎవరైనా వారి అలవాట్లు మార్చుకోవాలనుకొనే ముందు దానిపై పూర్తి అవగాహన కలిపించుకొని నమ్మకం ఏర్పరచుకొని గట్టిగా ప్రయత్నించాలి. ఈ ప్రక్రియలో ముందుగా ఎన్నో ఇబ్బందులు ఏర్పడుతాయి. ఈ ఇబ్బందులు, భావనలు ఎదుర్కొంటూ సంపూర్ణ పౌష్టికాహారాన్ని స్వీకరిస్తూ ముందుకు సాగితే మాత్రం పెద్దగా భేదాలు తెలియకుండానే మాంసాహారి నుండి శాఖాహారిగా మారిపోతారు.
అపోహ : శాఖాహారిగా ఉండడం వలన ఖర్చు పెరుగుతుందా లేదా తగ్గుతుందా?
వాస్త‌వం: మాంసాహార భోజనం కన్నా శాఖాహారం భోజనం ఖర్చు తక్కువ. ఈ తేడా 30 నుండి 50 శాతం వరకూ గమనించవచ్చు.
అపోహ : శాఖాహార భోజనంలో విటమిన్ బి 12 ఉండదు?
వాస్త‌వం: శాఖాహారంలో బి12 విటమిన్ తప్ప శరీరానికి కావల్సిన అన్ని విటమిన్లు, పోషకాలు లభిస్తాయి. ఎందుకంటే బి12 అనే విటమిన్ కేవలం జంతువుల మాంసంలో మాత్రమే లభిస్తుంది కాని మొక్కల ద్వారా దొరికే ఆహార పదార్థములలో ఉండదు. దీనికి ప్రత్యామ్నాయంగా బి12 విటమిన్ సప్లిమెంట్లు తీసుకోవాల్సి ఉంటుంది. అయితే ఇటీవల కాలంలో పలు రకములైన ఆహార పదార్థములు అంటే ఫోర్టిఫైడ్ సిరియల్స్, సోయా ఉత్పత్తులలో బి12 కలిపి విక్రయిస్తున్నారు. వీటి వినియోగం ద్వారా ఈ లోటు తీర్చుకోవచ్చు.
అపోహ : సంపూర్ణ పౌష్టికాహారం శాఖాహారులకు ఏఏ ఆహార పదార్థముల నుండి లభిస్తుంది?
వాస్త‌వం: క్రింద పేర్కొన్న ఆహార పదార్థముల నుండి శరీరానికి అవసమరైన పౌష్టికాహారాన్ని పొందవచ్చు….
• విటమిన్ బి 12 – పాలు, పాల ఉత్పత్తులలో కొద్ది మాత్రం, బి 12 విటమిన్ కలిపిన ఫోర్టిఫైడ్ సిరియల్స్ లేదా ఆహార పదార్థములలో, సోయా, బ్రెడ్ వంటి ఉత్పత్తులలో
• విటమిన్ డి – పాలు మరియు పాల ఆధారిత ఉత్పత్తులన్నింటిలోనూ మరియు సూర్మరశ్మి
• కాల్షియం – పాల ఉత్పత్తులు, ముదురు ఆకుపచ్చ రంగు ఆకు కూరలు, బ్రొకొలి, బాదం, రాగులు, టోఫు వంటి వాటిలో
• ప్రోటీన్లు – పప్పు ధాన్యాలు, పాల ఉత్పత్తులు, గుడ్లు, టోఫు, సోయా ఆధారిత ఉత్పత్తులు, ఎండబెట్టి బీన్స్, పలు రకములైన గింజలు, మష్రూం వంటి వాటిలో
• ఇనుము – గుడ్లు, ఎండబెట్టిన బీన్స్, డ్రై ఫ్రూట్స్, తృణ ధాన్యాలు, పచ్చని ఆకుకూరలు, రాగి, ప్రొమోగైనేట్, బీట్ రూట్, కారెట్, బెల్లం, అటుకులు వంటి వాటిలో
చిన్న పిల్లలకు, ఆటగాళ్లకు, గర్భవతులైన మహిళలకు శాఖాహారం సరైనది కాదు?
సరైన రీతిలో రూపొందించబడిన శాఖాహారం అన్ని రకములైన మానవులకు సంపూర్థ పౌష్టికాహారం అందిస్తుంది. అందులో పిల్లలు, ఆటగాళ్లు లేదా గర్భవతులైన మహిళలు కూడా. అయితే ఆయా వర్గాల వారికి ఎలాంటి సంపూర్ణ ఆహారం అందించాలో అవగాహన పెంచుకొని తదనుగుణంగా ఆహారాన్ని తయారు చేసి ఇవ్వాల్సి ఉంటుంది. ఉదాహరణకు గర్భవతులకు ఎక్కువగా ఐరన్ లేదా విటమిన్ సి ఉంటే ఆహారాన్ని అందించాలి. ఇందుకోసం వారు సాధారణంగా తీసుకొనే ఆహారంతో పాటూ జామపండు లేదా ఉసిరి చిన్న మొత్తంలో తీసుకొంటే సరిపోతుంది.
ఇక చిన్నారుల పెరుగుదలకు అవసరమైన ప్రోటీన్లు శాఖారంలో ఎక్కువగా ఉంటాయి. అయితే వీరికిచ్చే అహారంలో ఎక్కువ కాలరీలు ఇచ్చే పలుకరములైన వంటకాలను చేర్చగలిగితే వారు రుచులు ఆస్వాదిస్తారు.
ఇక ఆటగాళ్లకు ఎక్కువ శక్తి, మరింత సమర్థవంతంగా పని చేయడానికి అవసరమైన పోషకాలన్నీ శాఖాహారంలో ఉంటాయి. అయితే అన్ని రకములైన పోషకాలు, మినరల్స్ ఉండేలా మెనూ రూపొందిస్తే సరిపోతుంది.
అపోహ : శరీరంలో ఉండే ఎముకల దారుఢ్యం పెరగడానికి శాఖాహారంలో పాలఉత్పత్తులు తప్పనిసరా?
శాఖాహార ఆహారంలో పాల ఉత్పత్తుల ద్వారానే కాకుండా ఎముకల దారుడ్యానికి అవసరమైన కాల్షియం, విటమిన్ డి మరియు ప్రోటీన్లు పలు రకములైన ఆకుకూరలు, బాదంపప్పు మరియు విత్తనాలలో దొరుకుతాయి. వీటిలో దొరికే కాల్షియం లో ఆక్సలేట్లు ఎక్కువగా ఉండి ఎముకలు కాల్షియాన్ని ఇముడ్యుకొనే స్థాయిని తగ్గిస్తాయి కూడా.
ఒక వేళ మీరు జంతువుల నుండి వచ్చే పాల ఉత్పత్తులు కూడా తీసుకోకూడదని భావిస్తే అందుకు తగినట్లుగా ఆకుకూరల వినియోగం పెంచడంతో పాటూ సోయా పాలు, పలురకములైన సిరియల్స్, ఆరెంజ్ జ్యూస్, టోఫూ వంటి వాటిని తీసుకోవాల్సి ఉంటుంది. దీంతో పాటూ సరైన వ్యాయామం చేయడం ద్వారా ఎముకల సామర్థ్యాన్ని, దారుడ్యాన్ని పెంచుకోవచ్చు.
