చిరంజీవి… శ‌త్రువులు సైతం అభిమానించే హీరో. అన్నింటినీ మించి త‌నను శ‌త్రువుగా భావించే వారిని కూడా ఆద‌రించ‌గ‌ల గొప్ప మ‌న‌సున్న వ్య‌క్తిత్వం. స్నేహితుల కోసం సినిమా తీశాడు. న‌ష్టాల్లో ఉన్నా ఆదుకోమంటూ మ‌రో మిత్రుడు వ‌స్తే పైసా తీసుకోకుండా న‌టించి అప్పుల భారం తీర్చాడు. ఇక గుప్త‌దానాలు.. ఇంటికి వ‌చ్చిన వారు ఏ అవ‌స‌రం వ‌చ్చినా నేనున్నానంటూ భ‌రోసానిచ్చే ఆత్మీయుడు. ఇప్పుడు అదే బాట‌లో లంకేశ్వ‌రుడి సినిమాకు కో డైరెక్ట‌ర్‌గా ప‌నిచేసిన ప్ర‌భాక‌ర్ పిల్ల‌ల చ‌దువుకు ఫీజులు చెల్లించి ఆదుకున్నారు.
ప్ర‌భాక‌ర్ మాట్లాడుతూ-“నేను దాస‌రి వ‌ద్ద కోడైరెక్ట‌ర్ గా ప‌ని చేశాను. చిరంజీవి న‌టించిన లంకేశ్వ‌రుడికి కోడైరెక్ట‌ర్ గా చేశాను. కానీ ఇటీవ‌ల `హెల్ప్ లైన్` అనే సినిమా తీసాను. ద‌ర్శ‌క‌నిర్మాత‌గా చాలా న‌ష్ట‌పోయాను. ఆ సినిమాని ఎవ‌రూ రిలీజ్ చేయ‌క న‌ష్ట‌పోయాను. మా అబ్బాయికి సీబీఐటీలో ఇంజినీరింగ్ పూర్త‌యి రెండేళ్ల‌య్యింది. వాడి సర్టిఫికెట్లు డ‌బ్బు క‌ట్టి తేవాలి. పాప‌కు బీబీఏ ఫైన‌ల్ ఇయ‌ర్ కి వ‌చ్చింది. 2.5 ల‌క్ష‌ల ఫీజు క‌డితేనే ఎగ్జామ్ రాయ‌గ‌ల‌దు. ఎంత ప్ర‌య‌త్నించినా డ‌బ్బు ముట్ట‌లేదు. దీంతో సాయం కోసం ఎవ‌రిని అర్థించాలి? అనుకున్నాను. నా ఉద్యోగం మాటేమో కానీ .. చెల్లి చ‌దువు ప‌రీక్ష ఫీజు క‌ట్టాలి.. అని నా కుమారుడు అన్నాడు. నా ఇద్ద‌రు పిల్ల‌ల భ‌విష్య‌త్ ని కాపాడుకోలేను.. నా ఇల్లు శ్మ‌శాన వాతావ‌ర‌ణంలా మారిందని బాధ‌ప‌డ్డాను. కానీ ఏదోలా ప్ర‌య‌త్నించాను. తెలుగు చిత్ర‌సీమ‌లో చిరంజీవిగారు మాత్ర‌మే ఈ సాయం చేయ‌గ‌ల‌రు. ఆయ‌న‌ను అర్థించేందుకు క‌లిసాను.
30ఏళ్ల క్రితం లంకేశ్వ‌రుడికి ప‌ని చేసిన‌ప్పుడు ఎంత ప్రేమ‌గా చూసుకున్నారో ఇప్పుడు కూడా అదే ప్రేమ‌ను క‌న‌బ‌రిచారు. వెంట‌నే స్పందించి ఫీజు ఏర్పాటు చేశారు. ఆ ఫీజును ఇన్ టైమ్ లో క‌ట్ట‌లేక‌పోవ‌డంతో హాల్ టికెట్ ఇవ్వ‌లేమ‌ని అన్నారు. కానీ చిరంజీవి గారు సాయం చేశార‌ని అన‌గానే అక్క‌డ స్టాఫ్ అంతా సాయం చేశారు.
గ‌జేంద్ర మోక్షంలో మొస‌లికి చిక్కిన గ‌జేంద్రుని కాపాడేందుకు వ‌చ్చిన మ‌హా విష్ణువులా చిరంజీవి న‌న్ను ఆదుకున్నారు. చిరంజీవి గారు ఆదుకున్నారు అన‌గానే నా క‌ష్టం విని రామ్ చ‌ర‌ణ్ గారు వారి స్టాఫ్ కూడా అంతే సాయం చేశారు. నేను ఈరోజు ఇలా మాట్లాడానంటే దానికి చిరంజీవి గారు.. రామ్ చ‌ర‌ణ్ గారు ఆదుకోవ‌డం వ‌ల్ల‌నే అని అన్నారు. ప‌రిశ్ర‌మ‌లో ఎంద‌రికో సాయం చేసిన మెగాస్టార్ ఇటీవ‌ల కొంద‌రు ఆర్టిస్టుల‌కు చెక్కుల రూపంలో ఆర్థిక సాయ‌మందించారు. ఇప్పుడు క‌ష్ట‌కాలంలో పిల్ల‌ల ప‌రీక్ష‌ల‌కు ఫీజులు క‌ట్ట‌లేని కోడైరెక్ట‌ర్ ప్ర‌భాక‌ర్ ని ఆదుకున్నారు. అందుకే ఆయ‌న‌ను ప‌రిశ్ర‌మ బాస్ అని గౌర‌వించింది. చిరంజీవి సాయానికి హ్యాట్సాఫ్‌.
